Jojo, dass isch jo tüpisch Maa,
immer über eus arme Aargauer flueche, aber ah Fasnacht
chömmets denn gern zu Eus übere. Am Schränzerball
in Sins isch d'Luz met de Tanja immer gern gange. So au ah
dem gwüse Obig im Februar '99. Grad ehmol eis Zwetschge
hämmer trunke, als so ehn komische Maa mit ere no komischerer
Perüge ko isch. Er het Tanja scho kännt, und het
Hoi gseit. Ich has denn ned chönne unterloh, ihn ahszünde,
wäge sinere Perüge. Cool het ehr nüd de gliche
to, und het eus ehn Rundi Zwätschge bstellt. Mer hend
dänn Ahgstosse, und wo ich min Name Gseit ha, seit er
de denkwürdig Satz:
Ah, Luz heissisch du, gnau wie mis Lieblingskafi, nämli
Chrüter Luz...(!!!!)
Nach emene wili Zwätschge simer dänn
uf Wodka umgstiege, und wo Musig ahfoh spiele het, benech
plötzlich met ihm uf de Tanzflächi gsi. Er het mir
welle s,Tanze bibringe. Mer händ de ganz Obig mitenand
tanzet, und am Schluss hanis Tanze im Griff gha, und zwüsched
eus hets gfunket.
Da mer dozumol noh kei Natel gha händ, hämer Eus
ganz altmodisch Adresse ustuschet.
Ihm März benech - Tanja sei Dank - ihn
go bsueche ah de Musigbar ahm Chränzli z'Obfälde.
Er het eine uf cool to, und mer z'verstoh gehe, das ich ihm
z'jung be (damals 17, er 23-zgi!)
Nach stundelange diskutiere met de Tanja,
und öppe 3 Telefon be ihm deheime, wo immer Mama Edith
abgnoh het, hämmer dass Thema Dominik ah d'Akte gleit.
Wie dass so isch, isch ame ihm Summer das
berühmt berüchtige Auwerdorffäscht im wunderschöne
Aargau, bessser gseit im Freiamt. Natürli händ Tanja
und ich dass ned dörfe verpasse, und frohes Mutes, au
well ich Abschlussprüfig bestande ha, simmer am Samschtigobig
loszottlet. Es isch ned lang gange, da benich ihm Dominik
über de Wäg glofe. Im Raclettestübli simmer
dänn ehs Wyli go trinke, und ehs het feins Raclette au
geh. Mer händs uh luschtig gha, aber de Domi het mer
z'verstoh geh, dass es us eus zwöi nüd ka geh, wellich
ihm eifach noh z'jung be.
2 Akt. Auwerdorffäscht: Der Sonntag
Am Sunntig obig isch ame immer ehs Konzert gsi im Fäschtzält.
Natürli benech au dete gsi. Natürli au de Dominik,
aber ich benem schön usem Wäg gange. Plötzlich
stoht eine hinter mer, nimmt meh ih Arm, und ich ha d'Welt
nümme verstande. Wieso kunnt de jetzt zu mer, wenn ich
ihm jo eh s'jung be??? Er het mer ehn Kuss geh, und gseit,
kumm, mer probiereds eifach ehmol.
Set 9 johr probiered mer, und mer händ
scho mängs dörfe erläbe. Händ viel erlebt,
viel zämme duregmacht, viel gfreuts, viel trurigs. Aber
eis isch immer noh glich, metemene
f eine Kafi Chrüter, Zwätschge, Williams oder Quitte
gseht die Wält amme immer viel schöner us...
|
